طلب اكسبرت للبولنجر باند من استاذنا الغالي أ. كيرا

السلام عليكم ورحمة الله وبركاته
تحيه طيبه استاذي الغالي

بعد اذنك محتاجه برمجة الاكسبرت للاستراتيجيه التاليه والحصول علي نسخه مفتوحه وكود - الاستراتيجيه ممتااااازه وهديه للجميع وشروطها سهله بس صعب السيطره عليها يدويا وشغاله عليها فتره بس من الموبايل لضيق الوقت ومجزيه وفيها خير والله اعلي شاهد علي كلامي

ولك جزيل الشكر والتقدير

المؤشرات الاساسيه المعتمد عليها الاستراتيجيه ( لكل الفريمات )
1- عدد 2 بولنجر باند : الأول بالاعدادت الافتراضيه ( امكانيه تغيير الاعدادت ) - الثاني الاعدادت الافتراضيه ولكن Shift - 2 ( امكانيه تغيير الاعدادت )
1- الاستوكاستيك اعدادت ( 5 , 2 , 2 ) ( امكانيه تغيير الاعدادت )
3- الماكد الاعدادت الافتراضيه ( امكانيه تغيير الاعدادت )

الفلاتر لتحديد الاتجاه حتي تكون الصفقات بالاتجاه العام
1- موفنج افريج واحد باعدادت 200 سمبل كلوز ( امكانيه تغيير الاعدادت ) + 4 تايم فريم لتحديدهم
2- الايشموكو كسحابه فقط باعدادتها الافتراضيه ( امكانيه تغيير الاعدادت ) + 4 تايم فريم لتحديدهم


الدخول في الصفقات كالتالي

شراء كما بالصوره في حالتين

الحاله الاولي للشراء الدخول في الصفقات ( معتمد علي البولنجر الثاني shift -2 )




ملف مرفق 25321


الحاله الثانيه للشراء الدخول في الصفقات ( معتمد علي البولنجر الاول shift 0 )




ملف مرفق 25322

بيع كما بالصور في حالتين

الحاله الاولي للبيع الدخول في الصفقات ( معتمد علي البولنجر الثاني shift -2 )




ملف مرفق 25323


الحاله الثانيه للبيع الدخول في الصفقات ( معتمد علي البولنجر الاول shift 0 )




ملف مرفق 25324


الخصائص المطلوبه بالاكسبرت

استاذ كيرا
تحيه طيبه وبعد ويارب 2021 تكون سنه سعيده عليك وعلي كل الاسره الكريمه وكل احبابك يارب

ممكن في الخصائص المطلوبه اضافه Close at Reserve وهتكون خاصه اذا تفعلت بان الهدف الثاني يغلق مع ظهور اشاره عكسيه

السلام عليكم
كنت عامل اكسبرت قبل كده شبيه باستراتيجيتك بس كانت معتمدة ع البولينجر والاستوكاستك فقط
ف تطوعاً مني لحضرتك وللمنتدى الكريم عدلت الاكسبرت مع اضافاتك الجديدة لكن ناقص بعض الحاجات
1- بالنسبة لتحديد الاستوب عند اخر قاع او قمة فدي لازما قاعدة نحدد ع اساسها القمة او القاع
انا كنت بستخدم للو او هاي شمعة اليوم السابق لتحديد القمة/القاع لو الشغل ع الفريمات الصغيرة
او الاسبوع السابق لو الشغل ع الفريمات الكبيرة
وبالتالي الاستوب المتاح داخل الاكسبرت هو اليدوي فقط
ف قولي حضرتك شغالة ع فريم ايه؟
2- التنبيه

+ أرسال ايميل فور فتح واغلاق الصفقات
دي لسه منضافتش ع الاكسبرت لاني معرفش الكود بتاعها وكمان مش مهمة دالوقتي لحد اما نخلص باقي الشروط والحاجات الاهم اولاً
3- اضفتلك الفلاتر وهما موفنج 200 وسحابة الايشموكو لكن حضرتك لم توضحي كيفية استخدامهم ف شروط الدخول
فما هي الشروط؟
باقي الحاجات اظنها مظبوطة
جربي النسخة المرفقة وبلغيني بأي تعديلات مطلوبة

https://drive.google.com/file/d/1bF1130t-Clm9NbkM8XpmVObqSH-V7qx-/view?usp=sharing

السلام عليكم استاذ سبيل
اهلا بحضرتك واشكرك علي مجهودك ومباردتك بالمساعده

والحقيقه قريت رد حضرتك من شويه من الموبايل عشان كنت بمشوار ولسه راجعه بس مش عارفه كنت هرد اقول ايه احسن اتفهم غلط واتفهم اني قليلة ذوق

بس الفكره كلها اني بالاساس طلبه من استاذ حسن وانا فعلا عندي اكسبرت بنفس الفكره الي قولت عليها بس فقط معتمد علي بولنجر واحد واستكوكاستك وتخلو من تفاصيل كتيرمن الي انا كاتباها

انا شوفت حالا الاكسبرت الي حضرتك عدلت عليه وبارك الله فيك

بس انا الحقيقه طلب اكتر من طلب من استاذ كيرا وعمله لي مشكورا وكمان مرتاحه نفسييا مع برمجته والطريقه الي بيعمل فيها اعدادت الاكسبرت

مش قصدي والله ارد دعمك باسلوب يتفهم غلط بس انت اكيد فهمت الي اقصده من موضوع راحه نفسيه

ردا علي حضرتك في موضوع الاستوب لوز عشان برضه مش اتفهم غلط اني مش عاوزه اقول تفاصيل

الحقيقه انا بشتغل من اول فريم الدقيقه لفريم النص ساعه واحيانا الساعه و هاي ولو الشمعه بيعتمد علي الفريم المستخدم

موضوع المفونج والايشكومو لفلتره الاتجاه العام بمعني ان الصفقه تتفتح مع الاتجاه العام عند توافق الشروط

بالنسبه للايميل فهو اهم شئ عندي لانه هو الي هينبهني بفتح الصفقه عشان انا شارحه كنت ظروف انشغالي لاستاذ كيرا واني وقت ضيق اوي فكنت بحتاج برمجته لاساليب بشتتغل بيها لضيق وقتي اوي وعدم تفرغي

والشئ الاخير اني باعته في اول موضوعي ليه عن طلب كود الاكسبرت ونسخه مفتوحه

مره تانيه ياريت مش تفهم ردي بمحمل سئ او غلط وبجد متشكره اوي ليك

ملحوظه انا جربت الاكسبرت ولم يفتح اي صفقه كما انه بياخد وقت كتير في البك تيست ودي من اجمل الحاجات مع برمجه استاذ كيرا ان الاكسبرتات بتكون خفيفه وسريعه واسفه مش اقصد شخصك الكريم في شئ بس بوضح لي متحفظه علي طلبي الاكسبرت من ا. كيرا عشان خوفت يشوف ردك فيفتكر ان خلاص وطلبي يقف

أ. حسن يارب تكون بخير وعافيه وصحه وسلامه

في انتظار رد حضرتك لو في اي استفسار او شئ مش واضح

الحقيقة انا ترددت قبل ما اعدل ع الاكسبرت وابعتهولك ليفتكر الاخ حسن تعدي عليه ويزعل لكن انا لقيت الاكسبرت عندي جاهز ومش هياخد مني وقت ف عدلت عليه من باب المساعدة مش اكتر
لكن اسلوبك صدمني الحقيقة وفيه شوية تعالي
اولا اسف اني تدخلت ف البوست وعملت الاكسبرت لكن فيه شوية ملاحظات بسيطة حابب اوضحهالك
- لما تلاقي حد بيساعدك اسمعي منه للاخر ومتفقديش علاقتك بيه لانه اكيد ف النهاية هيكون مفيد بمعنى انك توسعي شبكة علاقاتك بالمبرمجين لانك مش عارفة بكرة فيه ايه
متعرفيش ان المنتدى ده وقع قبل كده وفقدنا الاتصال بالادارة والاخ حسن فترة طويلة وكانت ليلة طويلة سعادتك ولما المنتدى رجع كان فاضي وفقدنا الداتا الل عليه والاخ حسن مشكوراً رجع جزء والباقي اعاده من جديد
مش عايز اقولك الواحد كان محتاس ازاي من غير الاخ حسن والمنتدى ف الل يلاقي مبرمج ف مجالنا ده يمسك فيه لانهم قليلين خاصة العرب
- يبدو ان حضرتك متعرفيش ان المؤشرات الكتيرة والاوبجيكت بتقل الباكتيست وخاصة المؤشرات الخارجية
- بردو الفلاتر مش واضح شروطها انا فاهم ان الفلاتر لتحديد الاتجاه لكن مش مكتوبة ف شروط الدخول واظن اخي حسن يوافقني ع كلامي
- رغم ان الاخ حسن بيرفض يعدل ع اكسبرتات الغير لكن بيعدل ع اكسبرتاتي لاني متعلم ع ايده وكتابتي للاكواد نفس كتابته
- الاكسبرت جربته حالا ولقيت خطأ بسيط جدا ف كود تحديد اللوت عدلته واشتغل تمام بس مش هبعته خلاص هحتفظ بيه لنفسي واتمنى الاخ حسن يعملهولك كما تتمني
مش حابب اتكلم كتير والموضوع يدخل ف جدال ويبوظ اتمنى لا تزعلي من كلامي لو فيه حدة وعديها ويفضل تتجاهليني ومترديش عليا عشان مش عايز الموضوع يبوظ والله

كلامي الان موجه للاخ حسن الاكسبرت عندي جاهز وفيه تقريباً 90% من المطلوب ف البوست لو حضرتك حابب تاخده تضيف الحاجات الناقصة وتعدل عليه هبعتهولك خاص اما لو حابب تعمله من جديد ف الل يريحك
واسف مرة اخرى ع مداخلتي

اولا انا مش داخله المجال اعمل شبكة علاقات مع المبرمجين وبرضه لو هنفترض كلامك صحيح فيكفيني معرفتي بالمنتدي و أستاذ حسن واستاذ ابو عمر

ولو المنتدي وقع فاكيد عشان انا من متابعينه فهستحمل وهنتظره القائمين عليه ومش هكمل الي عاوزاه الا منهم حتي لو مش هعمله

ثانيا

انا مش عارفه منين حضرتك لقيت ان كلامي فيه تعالي
داه انا عماله اعتذر وبقولك مش عاوزه تفهمني غلط وشكرتك علي المجهود وفكرت في كل كلمه قبل ما ابعتها عشان مش يجي رد زي داه وبرضه انت رديت رد خلاني بصراحه قولت مش كان في اي لزوم اني افكر في كل كلمه كتبتها وكنت رديت بسطر بس وقولتلك متشكره مثلا وهنتظر رد ا. حسن
ومع ذلك مع كل تبريري وشرحي برضه شوفته بالاسلوب اني متعاليه !!

علي كل حال انا معنديش مشاكل طالما الرد باسلوب كله ذوق واعتذار مش عجب حضرتك ويبقي يغلطني اي حد شايف في كلامي تعالي ووقتها هعتذر ليك
بس انا تعودت علي اسلوب برمجه استاذ حسن من حيث تنظيم الاكسبرت كادوات واوامر وداه حقي اني اطلب من شخص باسمه وحقه برضه انه لو مش عاوز يرد ما يردش او لو مشغول برضه في الحاله دي هنتظره

تاني شئ اكسبرت حضرتك مكتوب عليه اسم موقعك وايميلك وانا ماعلقتش بس اظن داه مش صح في منتدي دخلت عليه بنفسي طلبت منه طلب موجه للمنتدي فلو حضرتك عاوز تساعد فاكيد كنت هتشيل اي روابط لان واضح جدا لو مش تقصد انها دعايه !!!

اخيرا كلامك يعتبر فيه جزء كبير للاساءه للمنتدي وواضح انك مش مدرك داه وخصوصا لما بتقول ان المنتدي وقع قبل كدا وكانت حوسه لانك كدا بتشهر بيه مع انك المفروض زي ما بتقول من تلامذته فانا بقولك كلامك الي صدمني

اعذرني بس رديت بمنتهي الادب والذوق قولت بتعالي فخلينا بقا نتكلم بالاصول ولا انا غلطانه !!

ملف مرفق 25375

أ. حسن انا اسفه للتشتيت تحب اكتب طلبي تاني ولا تمام

انا عملت اقتباس علي اول شرح للموضوع وهو فيه كل شئ

وعليكم السلام
المرجو توضيح أكثر لما يلي :
بولنجر بـازاحة 2- غير منطقي فلا يمكن مقارنة الشمعة الحالية مع خطوط بولنجر مزاحة للخلف بشمعتين !! (سهل الملاحطة كما بالصورة أسفله) إلا إذا كان هذا هو المطلوب بمقارنة الشمعة الحالية مع البولنجر عند شمعة الازاحة
الهدف هل عبارة عن اختراق السعر للبولنجر ام يوضع الهدف مباشرة عند البولنجر؟
الستوب قمة (أو قاع) يجب توضيح شروط القمة (أو القاع)
مثلا قمة مبنية على اعلى سعر ضمن 10 شموع سابقة ... وهكذا ...

واخيرا ما هي شمعة الدخول الاساسية هل عند شمعة قطع الستوكاستيك بالتشبع أو عند قطع البولنجر ام بتحقق احدهما أم شرط مفتوح بأي شمعة تحقق التشبع والاختراق ؟

السلام عليكم ا. حسن

بص انا بصراحه مش فاهمه اوي السؤال بس هي الاستراتيجيه مبنيه علي خطين بولنجر عشان الشموع الي بين الخطين بيتم تجاهلها يعني اذا شمعه مثلا اغلقت بين خطين البولنجر بنتجاهل الفرصه دي وبيكون الدخول اما شمعه اغلقت خارج الحد الاخير لاخر بولنجر سواء فوق او تحت او اغلقت تحتهم (مش بينهم ) - فهل كدا قدرت اوضح الفكره ؟

وهل داه صعب كبرمجه ولا حضرتك قصدك تفهم الفكره

بالنسبه للاهداف بتكون هدفين اول هدف لو مثلا بيع الخط السفلي للبولنجر بمجرد ملامسه الشمعه والهدف الثاني الحد السفلي والعكس - ويفضل يكون ملاحقه السعر لحين ظهور اشاره عكسيه داه بالنسبه للهدف الثاني - والاول يكون ملامسه الخط النصف للولنجر

الاستوب انا لما بشتغل بشوف الفريم الي انا عليه لو في الشراء بيكون اقرب قاع لسعر الدخول والعكس في البيع واظن داه صعب برمجيا ؟ فممكن نخلي الاستوب يدوي

مثال الصوره دي الصفقه علي فريم الساعه مثلا اقرب قمه ليها كانت بعد 24 نقطه تقريبا وكانوا حوالي تقريبا 44 شمعه بس هي مش بعدد الشموع ومش قادره اشرحها برمجيا بس لو مش هتنفع يبقي زي مابقول لحضرتك ممكن

ملف مرفق 25377


شمعه الدخول زي المثال كدا بغض النظر عن الفريم
الشمعه مجرد اغلاقها تحت خط البولنجر وكان الاستوكاستيك والماكد تشبع بيكون الشمعه الي عليها خط افق هي شمعه الدخول

يعني اذا الشمعه حققت الشروط بس الماكد والاستوكاستك مش محققين مش هيتم الدخول في الصفقه

ملف مرفق 25378

مثال تاني اغلاق جسم خارج البولنجر الدخول الشمعه الي تليها
والاستوكاستيك كان تشبع و الماكد فوق الصفر

ملف مرفق 25379